ប៊ុណ្ណ ចន្ទម៉ុល

លោក ប៊ុណ្ណ ចន្ទម៉ុល វីរៈជនខ្មែរមួយរូបនៅក្នុងសម័យតស៊ូទាមទារឯករាជ្យ ពីអាណានិគមបារាំង។ លោកបានបន្សល់ទុកស្នាដៃសៀវភៅចំនួនពីរក្បាល សៀវភៅចរិតខ្មែរ និងសៀវភៅ គុកនយោបាយ សៀវភៅទាំងពីរក្បាលនោះ បានអធិប្បាយពីដំណើជីវិតរបស់លោកជាច្រើនរឿង ជាពិសេសគឺ សរសេរបរិបទនយោបាយ នៅក្នុងសម័យកាលនោះ។ លោក ប៊ុណ្ណ ចន្ទម៉ុល ត្រូវពួកនគរបាលបារាំងចាប់ខ្លួន បញ្ជូនយកទៅដាក់គុក នៅលើគុកកោះត្រឡាច នៅក្នុងឆ្នាំ១៩៤២ ក្នុងពេលលោកទៅចូលរួមបាតុកម្ម ជាមួយក្រុមនិស្សិត ដែលក្រោកឡើងប្រឆាំងនឹងការគាបសង្កត់ជិះជាន់ទាពន្ធដារ។ នៅគុកកោះត្រឡាច លោក ប៊ុណ្ណ ចន្ទម៉ុល ជាអ្នកទោស ខ្មែរមួយរូប ក្នុងចំណោមអ្នកទោសខ្មែរ ជាច្រើនរូបទៀត ដែលត្រូវពួកបារាំងចាប់ខ្លួន។ នៅក្នុងគុកកោះត្រឡាច រយៈពេល៣ឆ្នាំ លោក ប៊ុណ្ណ ចន្ទម៉ុល មិនសូវទទួលរងការវាយដំ ធ្វើទារុណកម្ម យ៉ាងឃោរឃៅ ដូចអ្នកទោសផ្សេងៗ នោះទេ ដោយសារ លោក ប៊ុណ្ណ ចន្ទម៉ុល គាត់ចេះប្រដាល់។ លោក ប៊ុណ្ណ ចន្ទម៉ុល ជាអ្នកប្រដាល់ខ្មែរមួយរូប ដែលមានល្បីឈ្មោះ នៅក្នុងគុកកោះត្រឡាច បន្ទាប់ពីលោក បានវាយឈ្នះ អ្នកប្រដាល់ម្នាក់ ឈ្មោះ អាបេ ដែលជាជើងឯក ជនជាតិយួន ប្រចាំនៅកោះត្រឡាច នៅក្នុងឆ្នាំ១៩៤៣។ ហើយក្រោយមកទៀត នៅក្នុងឆ្នាំ១៩៤៤ លោក ប៊ុណ្ណ ចន្ទម៉ុល បានយកឈ្នះ អ្នកប្រដាល់ជើងឯកដ៏ល្បីឈ្មោះ ប្រចាំឥណ្ឌូចិន ជាជនជាតិយួនម្នាក់ទៀត មានឈ្មោះថា យ៉បាតុង។ ក្រោយពីលោក ប៊ុណ្ណ ចន្ទម៉ុល ប្រដាល់ឈ្នះ ជនជាតិយួនឈ្មោះ យ៉បាតុង មក កេរ្តិ៍ឈ្មោះរបស់ លោក ប៊ុណ្ណ ចន្ទ័ម៉ុល កាន់តែល្បីល្បាញរន្ទឺ នៅលើកោះត្រឡាច និងនៅក្នុងឥណ្ឌូចិនទាំងមូល។ ហើយគេបានឲ្យរហស្សនាមទៅ លោក ប៉ុណ្ណ ចន្ទ័ម៉ុលថា អ្នកប្រដាល់ជើងឯកប្រចាំនៅឥណ្ឌូចិន។